Puisi Lukman Hakim AG

Lukman Hakim AG

Ayat Taresna: N. Hidayati

monggu dha’ bula
dika kajunjung menangka pangeket sampan kakerrongan
amata yat-ayat taresna
ngaros songay-songay malorju’ tombuna binis
tape ta’ ngontap dhari pellok bibir bula
tanyengnga ora’ bula
ceccer e kennengngan tatemmona bula ban dika
se saleng pandeng, saleng sapa, saleng mesem
akakandha sajarna’na
alabat toron tana kaolemman sabungana
sajjegga bula nangale sonar bulan robana dika
ban bula ngedhing sowara e’-pae’ madduna
Daud e lesanna dika
ate akarettek terro alabbusa e kaderressan tanges mempe
se abubungan sajagat akkal ban pekker
tae lala’ e pepe kanganna dika
nandha’agi tasydid-ghunnana kajembaran
se patot erenggane sadaja harkat salaen dhapen

Daddali Pote

dhu, daddali pote
edhimma lebun se gabay patarangan
kennengngan ngaso
malebbur jailla, tape maddu rassana
edhakdhak bula se kaelangan ora’ rennyo ta’ atolang
daddali pote, ba’ taowa
tojjuwan pancer bula
padhapa’agi ka se nyarkaton
alemba’ nyoleng dhalem tandangnga
adiba’ ropa sepat guli e matana ate bula
daddali pote
maddu sabundel pasekkennagi pangara bula
bali’na dhadhar e ngalesserra angen
se ojan ta’ ojan, panas ta’ panas
ngello’, tadha’ seyang tadha’ malem
ta’ amosem

Panglepor Malem

bennengnga malem sateya
gambaran angen ceddu tera’ bulan
apanglepor bintang akeddhap ngecer ngacernang
lalang ngalang bulan narajang
bintang nyaba’ e sakerreng perreng kerreng
akoleja’ dika mesem nondhu’
apancoran longlang
legga edhalem aba’ bula

Bila Aba’ Kadhung Tapattre

matana dika se birang bulan
matana se angrajung sottra
makeller badanna se satoros kaba’ sampayan
ngerrat ate se dhaun-dhaun talempet
nyapcap benneng ngcernang mabangon tatengka
songay-songay kerreng
langnge’ sorop bintang bulan ellop
abareng bi’ aba’ semopos kencop
nondhu’ pas nyosopka guli enneng
se tapattre pako e seppena kejungan gendhing

Mata

neng e pettengnge
rebbang ngabas bang-rabangan antara se solap ban se sordhep
tape mon e tera’na
ta’ nanto nangale dhari ban bakal pettengnga

Aeng Matana Ebu
ngaremmes
agili
ngalocor
ngacernang socce!

Sumenep - Jakarta 2007

* Lukman Hakim AG, mahasiswa Sekolah Tinggi Ilmu Tarbiyah Aqidah Usymuni (STITA) Sumenep. Dia sengaja menulis puisi dalam bahasa Madura karena empat kota di Madura berada dalam momentum hari jadinya masing-masing.

Sumber: Jawa Pos