Ojhanna toron bhibhiddha etabur

Soetjipto Oetomo

Ojhanna toron bhibhiddha etabur
Dari se etabbur se odi' tanto bada
Ghi' dhimen, tellasan ekabur-lebur
Manabi mangken, samporna ibada

Tanemman bisa dhaddhi nan-dhinan
Toron ka ana' ka kompoy saterrossa
Amal ibada se samporna kalaksanan
Insya Allah etrema ban Se Kobasa

Ola'na tanemman datengnga sakalana
Se ecapo', saena dhuli parenge tora
Saponapa lerressa, saponapa kalerona
Ta' langkong kaula nyo'ona esapora

2003

Bhungka laen ta' kadhi bhungkana nyior

Soetjipto Oetomo

Bhungka laen ta' kadhi bhungkana nyior
Bhungkana lajhang katengal dari jhau
Na'-kana' samangken odi'na ngalo'nyor
Ngeba tilpun, sapatuna lemmes ta' abau

Salaen buwa sadhaja pada bada ghunana
Aeng dhegghana rassana ce' seggherra
Bhida moso aba' dhibi' ghi asakolana
Sapatuna aroma kole' matta tor gherra

Kajuna epadhaddhi pakakas e bengkona
Daunna erangket pas ekaghabai ata'na
Ce leburra nga'-enga' ka careta kona
Se paneka namong e paguyuban badana

2003

Jhalanna bakto maste pas etongenna

Soetjipto Oetomo

Jhalanna bakto maste pas etongenna
Se segghut lopot ojhan ban nemorra
Enga'na oreng bhuto coma saparlona
Enga'na ibada kodhu saomorra

Dari Blauran kaojhanan ka Kalidami
E Pucang serdang tor terrang arena
Mare apasa azakat pas silaturrahmi
Malar mogha daddhiaghi sampornana

Ojhan panas ta' keneng cagherraghi
Kala' hekmana bisaos ponapa badana
Maske bak abit se ta' aghi-panghi
Nyo'ona sapora pola bada kalerona

2002